პორტუგალიის სუპერლიგაში მოასპარეზე ერთადერთი ქართველის, ავთო ებრალიძეს “ჟილ ვისენტეს” მდგომარეობა უკეთესის სურვილს ტოვებს. მიმდინარე სეზონში საქართველოს ეროვნული ნაკრების შემტევის კლუბი ელიტაში ადგილის შესანარჩუნებლად იბრძვის.

Fanebi.com ებრალიძეს პორტუგალიაში დაუკავშირდა და საკლუბო ამბებთან ერთად სანაკრებო თემაზეც ესაუბრა.

– სამწუხაროდ ძალიან ცუდი სეზონი გვაქვს. მოვლენათა ასეთ განვითარებას არავინ ელოდა. ყველა, ვინც თვალყურს ადევნებს  პორტუგალიურ ლიგას ჩვენს ყოფნას ცხრილის შუაში პროგნოზირებდა, თუმცა ფაქტი სახეზეა და ეს რა თქმა უნდა პირველ რიგში ჩვენი ბრალია. 

- როგორ შეაფასებდი კლუბის შანსებს სეზონის ბოლოს. შეძლებთ ადგილის შენარჩუნებას? 

- სიტუაცია ძალიან რთულია, თუმცა ჩვენ ყველაფერს გავაკეთებთ. შანსები ჯერ კიდევ არის. 

- რას აპირებ იმ შემთხვევაში, თუ კლუბი პრიმეირადან გავარდება?

– ამ ეტაპზე სხვა გუნდში გადასვლაზე არ ვფიქრობ და მაქსიმალურად ვარ კონცენტრირებული “ჟილ ვისენტეს” მიმდინარე მიზნებზე. 

- ნაკრებზეც გკითხავ, სადაც თემურ ქეცბაიას მწვრთნელობის დროს ხშირად გიძახებდნენ. როგორ ფიქრობ, რა დააკლდა ქეცბაიას ფორმაციის გუნდს?

– ნაკრებმა შედეგს რომ ვერ მიაღწია ქეცბაიას ბრალი არ არის. განსაკუთრებული შედეგებისთვის არ ქეცბაიამდე მიუღწევია ვინმეს. ამ კაცმა ნაკრებში გული და სული ჩადო და ყველამ ნახა, თუ როგორ უნდოდა მას წარმატების მოტანა. მაგრამ, ყველაფერი მხოლოდ ქეცბაიაზე არ იყო დამოკიდებული. 

- მთავარი მწვრთნელის პოსტზე ცხადაძის დანიშვნას როგორ შეაფასებდი? 

- ცხადაძის თავკაცობით ნაკრებმა ორი მატჩი ჩაატარა. მალტელები დავამარცხეთ, გერმანიასთან კი გუნდმა კარგი შთაბეჭდილება დატოვა. 

- ნაკრებში შენს შანსებზე რას გვეტყოდი? 

- როცა ქეცბაია მიძახებდა იმ დროს ნაკრებში თამაში მეკუთვნოდა. პორტუგალიის ჩემპიონატში მეც და გუნდსაც კარგი სეზონი გვქონდა. ახლა კი გუნდიც ცუდ დღეშია და მეც ტრავმის გამო 3 თვე გამიცდა. თუმცა, უკვე დავბრუნდი და ვთამაშობ. იმედი მაქვს, დავიმსახურებ და ნაკრებში კვლავ გამომიძახებენ

- ტრავმის შედმეგ ფორმის აღდგენა თუ მოახერხე? 

– დიახ, თამაშები უკვე მიწევს და ნელ-ნელა ოპტიმალურ ფორმას ვუახლოვდები. 

როგორც იცით, გუშინ საქართველოს უმაღლესი ლიგის ტური გაიმართა. ქუთაისის “ტორპედომ” “გურია” 1-3 დაამარცხა.

Fanebi.Com დაუკავშირდა ქუთაისელთა შემტევ, ნიკა საბანაძეს და გუნდისთვის მნიშვნელოვან საკითხებზე გაესაუბრა.

- გამარჯობა ნიკა. პირველ რიგში, გილოცავ “ტორპედოს” გამარჯვებას. როგორ შეაფასებდი გუშინდელ შეხვედრას?

– სამწუხაროდ, შეხვედრისას სტადიონზე არ ვიმყოფებოდი და თამაშს ვერ დავესწარი. რაც შეეხება გამარჯვებას, ლანჩხუთში ძალიან მნიშვნელოვანი 3 ქულა მოვიპოვეთ და გუნდმა ძალიან საჭირო ქულები აიღო. მოგეხსენებათ ისიც, რომ აქამდე “გურიას” საკუთარ მოედანზე მარცხი არ ჰქონდა და ქუთაისის “ტორპედომ” შეძლო, მათი წაუგებელი სერია დაესრულებინა.

- როგორც ვიცით, ტრავმის გამო ვერ ახერხებ იმერელთა დახმარებას. რამდენად მძიმეა შენი დაზიანება და როდის დაუბრუნდები მოედანს?

– დაზიანება საკმაოდ მძიმეა. კოჭის ტრავმა მაქვს და ვმკურნალოდ. ჯერ-ჯერობით მიმდინარეობს მკურნალობის პროცესი და ვნახოთ, როდის გამოვჯანმრთელდები. ზუსტი პასუხის გაცემა არ შემიძლია.

- რა იქნება მიმდინარე სეზონში “ტორპედოს” მთავარი მიზანი?

– რა თქმა უნდა, გუნდს უნდა და ყველას სურვილია, სატურნირო ცხრილში რაც შეიძლება მაღლა ვიყოთ. აგრეთვე, ევროსაგზურებისთვის ვიბრძვით.

- და ბოლოს, ტრადიციული კითხვა: რამდენად იცნობთ ჩვენს ვებგვერდს და როგორ შეფასებდით მას?

– ხშირად ვსტუმრობ თქვენს ვებ-გვერდს და ძალიან საინტერესო ინფორმაციებსაც ვგებულობ. ძალიან კარგად მუშაობთ.

დღეს, საქართველოს 19-წლამდე ნაკრებმა უკრაინელ თანატოლებთან გამართული ამხანაგური მატჩი ფრედ – 0:0 დაასრულა. მატჩი ბანიკოვის სახელობის სტადიონზე გაიმართა და ადგილობრივ ქომაგთან ერთად, ტრიბუნაზე თავი კიევში მცხოვრებმა ქართველებმაც მოიყარეს. მატჩს უკრაინის ფეხბურთის ფედერაციის წარმომადგენლები და უკრაინის ეროვნული ნაკრების მთავარი მწვრთნელიც ადევნებდა თვალს.

საქართველოს ნაკრებს მოედანზე ჯიმი ტაბიძე გამოუძღვა, ახალგაზრდა მცველმა ამ მატჩში ნაკრებს პირველად უკაპიტნა. ნაკრების შემადგენლობაში ითამაშა დებიუტანტმა ზაურ გოგუაძემ, რომელიც თამაშში მეორე ტაიმის ბოლოს ჩაერთო.

საერთო ჯამში, პირველ ტაიმში ქართველთა სათამაშო უპირატესობა აშკარა იყო. დევდარიანის ნაკრები მწყობრად და შეთანხმებულად თამაშობდა. იმის მიუხედავად, რომ ნაკრებს ძირითადი ბირთვის მოთამაშეების მთელი „არმია“ აკლდა, გუნდმა კარგი შთაბეჭდილება დატოვა და ჩვენი უკრაინელი კოლეგებისგანაც არაერთი კომპლიმენტი მივიღეთ.

მეორე ტაიმში, ტემპი ცოტა დავარდა, თუმცა, ჩვენი შემტევი ხაზი მაინც სწრაფად და გამიზნულად უტევდა. შეტევები გაამწვავა მეორე ტაიმში შესულმა ბექა ჭკუასელმა, რომელიც კარგად ჩაერთო თამაშში და ასევე კარგად აუბა მხარი გიორგი ბერიძეს, რომელმაც მთელი მატჩი თავდაუზოგავად იბრძოდა. თუმცა, ასპროცენტიან საგოლე მომენტებამდე საქმე არ მისულა. მეორე ტაიმში გოშაძის კარს უკრაინელებიც რამდენჯერმე დაემუქრნენ, თუმცა, უშედეგოდ. ერთ-ერთი ყველაზე აქტიური იყო უკრაინის ნაკრებში მოთამაშე ბექა ვაჩიბერაძე, რომელსაც ქართველი გულშემატკივარი კარგად იცნობს. კარგად გამოიყურებოდა ჩვენი დაცვის ხაზიც და შეიძლება ითქვას, რომ მათ უხეში შეცდომა არ დაუშვიათ.

ხვალ, საქართველოს ნაკრებს მცირე აღდგენითი ვარჯიში ექნება და დანარჩენ დროს, დევდარიანი ფეხბურთელებს დაასვენებს. 30 აპრილს კი, იმავე სტადიონზე ამ გუნდების მეორე ამხანაგური მატჩი გაიმართება, რომელიც თბილისის დროით 13:00 საათზე დაიწყება.

უკრაინაU19 vs საქართველოU19 0:0 (ამხ.)

უკრაინაU19: მოზილი, ოსმანი, მატვიენკო, კირიუხანცევი, შებეტუნი (ბელოუსოვი 63), ვაჩიბერაძე, ზოტკო, კვიჩი (ზუბკოვი 46), ლუკიანჩუკი, მისიკი (შვედი 46), ტრეტიაკოვი

მთ.მწვრთნელი – ოლექსანდრ გოლოვკა

საქართველოU19: გოშაძე, ჩაბრაძე, მალანია, მარგველაშვილი, ტაბიძე, მოხევიშვილი (მამუჩაშვილი 83), შულაია, გოშთელიანი (გოგუაძე 75), ბერიძე, ხარაიშვილი, კვირკვია (ჭკუასელი 63)

მთ.მწვრთნელი – გიორგი დევდარიანი

გაფრთხილება: ვაჩიბერაძე, მატვიენკო, შულაია

სფფ-ის პრესსამსახური

კიევი, უკრაინა

რამდენიმე თვის წინ უკრაინაში მოთამაშე 1997 წელს დაბადებულ ლევან მაჭარაშვილზე ვწერდით, რომელიც “ობოლონის” ღირსებას იცავს და კიეველები მასზე დიდ იმედებს ამყარებენ. უკრაინის დედაქალაქის კიდევ ერთ კლუბში, “არსენალში” ლევანის ძმა, 21 წლის სერგი მაჭარაშვილი ჩაირიცხა, რომელიც ფეხბურთს 3 წლიანი პაუზის შემდეგ დაუბრუნდა და უკრაინელთა მოწონებაც დაიმსახურა.

“ფეხბურთის თამაში თემურ ფოცხვერიასთან დავიწყე, სადაც გიორგი ჭანტურია, ვაკო ყაზაიშვილი და სხვა გამორჩეული ფეხბურთელები ჩემი თანაგუნდელები იყვნენ. შემდეგ ჩვენი გუნდი დაიშალა და გიორგი დევდარიანთან მოვხვდი. სწორედ ამ დროს მომიწია 17-წლამდელთა ნაკრებში თამაში, თუმცა საკმაოდ მძიმე ტრავმა მივიღე და ეს შესაძლებლობა ვერ გამოვიყენე. სამკურნალოდ დიდი დრო დამჭირდა, რის შემდეგაც “დინამოს” დუბლებში მიმიღეს, სადაც რამაზ მუმლაძე იყო მთავარი მწვრთნელი. “დინამოში” ერთი სეზონი ვითამაშე და კარიერის გასაგრძელებლად პირველი ლიგის “ზოოვეტში” გადავედი, სადაც კვლავ მძიმე ტრავმა მივიღე და ოპერაცია დამჭირდა. სამწუხაროდ, ტრავმა იმდენად მძიმე იყო,  რომ ფეხბურთზე გული ამიცრუვდა.”

ტრავმებით გაწამებულმა 18 წლის მაჭარაშვილმა ფეხბურთზე უარი ვერ თქვა და საკამოდ ახლგაზრდულ ასაკში მწვრთნელობის დაწყება გადაწყვიტა.

“გამოჯანმრთელების შემდეგ საფეხბურთო კლუბ “საბურთალოდან” დამიკავშირდნენ და თემურ ფოცხვერიასთან ერთად 2000-წლიანების გუნდის ჩაბარება შემომთავაზეს, რასაც სიამოვნებით დავთანმხდი. მოგვიანებით თემურმა ინდივიდუალური ცენტრი გახსნა და იქაც ვეხმარებოდი. “საბურთალოში” კი ვალერი გაგუასთან ერთად ვავარჯიშებდი ახალგაზრდულ გუნდებს.

ჩემი სამწვრთნელო კარიერა 3 წლის განმავლობაში გრძელდებოდა. თუმცა, ოჯახის წევრების და განსაკუთრებით ბიძაჩემის დაჟინებული თხოვნით ვარჯიში დავიწყე და კიევში მაკაროვის ტურნირზე წავედი სათამაშოდ, რის შემდეგაც კიევის “არსენალის” დუბლებში სინჯებზე მიმიწვიეს.”

კიევში გამგზავრება აქტიურ ფეხბურთში დაბრუნებული მაჭარაშვილისთვის წარმატებული აღმოჩნდა. ქართველმა ნახევარმცველმა “არსენალის” დუბლებში საკუთარი შესაძებლობები კარგად წარმოაჩინა და პირველ გუნდში დაწინაურდა.

“დუბლებში გატარებული სამი თვის შემდეგ უკვე ორი კვირაა, რაც პირველ გუნდში დამაწინაურეს. ამ ეტაპზე თამაშები არ მიწევს, რადგან განაცხადი უკვე შევსებულია და მეც საბუთების პრობლემა მაქვს მოსაგვარებელი. თუმცა, იმედები მაქვს, რადგან გუნდში დამტოვეს.”

კიევში მყოფ ჩვენებურთან საუბრისას შესაძლებლობა ხელიდან არ გავუშვით და საქართველოს 19-წლამდე ფეხბურთელთა ნაკრებზეც ვკითხეთ, რომელიც უკრაინელ თანატოლებს ამ დღეებში ორჯერ ესპარინგა.

“პირველი შეხვედრა თანაბარი გამოდგა და ფრედ 0:0 დასრულდა. ბიჭებმა ყველაფერი გააკეთეს, მაგრამ ცოტა დააკლდათ გამარჯვების მოსაპოვებლად. თამამად შემიძლია ვთქვა, რომ ტაქტიკურად ჩვენი ფეხბურთელები უფრო გამოირჩეოდნენ და ბურთს მოწინააღმდეგის ნახევარზე კარგად იჭერდნენ. გარდა ამისა, ძალიან ძლიერები ვართ კონტრშეტევებზე თამაშისას. უკრაინელთა შემადგენლობაში კი ბექა ვაჩიბერაძე გამოირჩეოდა, რომელმაც რეალური მომენტი ვერ გამოიყენა და ბურთი ძელს გაარტყა.

მეორე მატჩი კი სამწუხაროდ 3:0 წავაგეთ. უკრაინელებმა მეტი ჟინი და მონდომება გამოიჩინეს, რაც შედეგზეც აისახა. სამწუხაროდ, ბევრი შეცდომა გვქონდა. შეიმჩენოდა, რომ უკრაინელები ფიზიკურად ჩვენზე ბევრად ძლიერები არიან.

როგორც იცით, გუშინ “დინამო არენაზე” უმაღლესი ლიგის 26-ე ტურის ცენტრალური შეხვედრა გაიმართა, სადაც ადგილობრივმა “დინამომ” პრინციპული მეტოქე, ქუთაისის “ტორპედო” მინიმალური ანგარიშით, 3:2 დაამარცხა.

Fanebi.Com დაუკავშირდა თბილისის “დინამოს” 19 წლის შემტევს და ზემოთაღნიშნულ დაპირისპირებასთან დაკავშირებით გაესაუბრა.

- გამარჯობა გიორგი. გილოცავ გუშინდელ მატჩში მოპოვებულ ძალიან მნიშვნელოვან სამ ქულას. როგორ შეაფასებდით დაპირისპირებას?

– გაიხარეთ, დიდი მადლობა. თანაგუნდელებს მადლობას ვუხდი თავდაბდებისთვის. რაც შეეხება თამაშს, ვფიქრობ, ყველამ მაქსიმუმი გავაკეთეთ და გამარჯვებაც დავიმსახურეთ.

- ამჟამად, სატურნირო ცხრილში “დინამო” მესამე ადგილს იკავებს და პირველადგილოსან “დილას” ოთხი ქულით ჩამორჩება. რა იქნება მიმდინარე სეზონში გუნდის მთავარი მიზანი?

– მანამ, სანამ მცირე შანსიც კი იქნება, ჩემპიონობისთვის ბოლო ტურამდე ვიბრძოლებთ. იცით, რომ გუნდი თასის ფინალშია. ამ ტიტულის მოსაგებად ყველაფერს გავაკეთებთ.

- ზამთრის სატრანსფერო ფანჯარაზე გუნდში ბევრი ახალი ფეხბურთელი მოვიდა. არის თუ არა თანაგუნდელებს შორის შეთამაშების პრობლემა და როგორი ურთიერთობა გაქვს მათთან?

– “დინამო” მიმდინარე სეზონში ბევრმა ფეხბურთელმა დატოვა, მათი უმეტესი ნაწილი კი ძალიან გამოცდილი იყო. გამოცდილი ფეხბურთელების წასვლა პრობლემას წარმოადგენს, მაგრამ ვფიქრობ, ახალი “დინამო” აუცილებლად მოიტანს შედეგს და თავის სიტყვას იტყვის ევროტურნირებზე. ამას დრო და მოთმინება სჭირდება. რაც შეეხება ფეხბურთელებთან ურთიერთობას, ყველაფერი იდეალურადაა.

დასრულდა სეზონი და კონტრაქტის ვადა სხვების მსგავსად, გუნდის კაპიტანსაც, გურამ ადამაძესაც ამოეწურა. “ტორპედოს” გულშემატკივრების უმეტესობას აინტერესებს, თუ როგორ განვითარდება 27 წლის მცველის მომავალი და დარჩება თუ არა ქუთაისში.

ამასთან და სხვა საკითხებთან დაკავშირებით, ადამაძეს Fanebi.Com გაესაუბრა.

-როგორც ვიცით, გუნდში ყველა ფეხბურთელს ამოეწურა კონტრაქტის ვადები. რა ხდება თქვენს მომავალთან დაკავშირებით და აპირებს თუ არა გუნდი, თქვენთან თანამშრომლობის გაგრძელებას?

- დიახ, სხვა ფეხბურთელების მსგავსად გუნდთან არსებული ხელშეკრულების ვადა მეც ამომეწურა. ამჟამად, ჩემსა და გუნდს შორის ახალი კონტრაქტის პირობებზე მოლაპარაკებები მიმდინარეობს.

- “ტორპედოს” ქომაგები, “ჯუნგლები” გუნდის ნამდვილ ლიდერად მიგიჩნევენ და ძალიან გაფასებენ. მათ კლუბში ყველაზე მეტად თქვენი დარჩება სურთ. რას ფიქრობ მათზე და თავად თუ მიიჩნევთ თავს გუნდის ერთ-ერთ მამოძრავებელ ძალად?

- გუნდის ქომაგებზე კარგის მეტი არაფერი მეთქმის. ისინი ნებისმიერ მომენტში ჩვენს გვერდით არიან და მხურვალედ გვქომაგობენ.

- და ბოლოს, როგორ შეაჯამებდი “ტორპედოს” მიერ განვლილ, მიმდინარე სეზონს და კმაყოფილი ხარ თუ არა, გუნდის ნაჩვენები შედეგით?

- გუნდმა მეორე წრეში დასახული მიზანი შეასრულა და ამით ძალიან კმაყოფილი ვარ. უბრალოდ, ჩვენ სატურნირო ცხრილში უფრო მაღალი პოზიციის დაკავება შეგვეძლო და სამწუხაროა, რომ ეს ვერ მოვახერხეთ.

როგორც მოგეხსენებათ, სეზონის დასრულების შემდეგ, “ტორპედოს” აბსოლუტურად ყველა ფეხბურთელს გუნდთან არსებული კონტრაქტის ვადა ამოეწურა.

იმერელთა ქომაგებს, “ჯუნგლებს” ყველაზე მეტად ლიდერების მომავალი აწუხებთ, დარჩებიან თუ არა ისინი, მათ საყვარელ კლუბში.

ამასთან დაკავშირებით, “ტორპედოს” ერთ-ერთმა ლიდერმა, გიორგი ქიმაძემ Fanebi.Com-თან ისაუბრა.

-როგორც ვიცით, გუნდში ყველა ფეხბურთელს ამოეწურა კონტრაქტის ვადები. რა ხდება თქვენს მომავალთან დაკავშირებით და აპირებს თუ არა გუნდი, თქვენთან თანამშრომლობის გაგრძელებას?

- ამჟამად, ჩემსა და კლუბს შორის ახალი კონტრაქტის თაობაზე მოლაპარაკებები მიმდინარეობს. დიდი ალბათობით, შეთანხმებას მივაღწევთ და “ტორპედოში” დავრჩები.

– “ტორპედოს” ქომაგები, “ჯუნგლები” გუნდის ნამდვილ ლიდერად მიგიჩნევენ გურამ ადამაძესთან ერთად და ძალიან გაფასებენ. მათ კლუბში ყველაზე მეტად თქვენი დარჩება სურთ. რას ფიქრობ მათზე და თავად თუ მიიჩნევთ თავს გუნდის ერთ-ერთ მამოძრავებელ ძალად?

- მამოძრავებელი ძალა არამგონია ვიყო, ამ გუნდში ბევრი კარგი ფეხბურთელია. რაც შეეხება, გულშემატკივრებს, მათ მხარდაჭერას როგორც მოედანზე, ასევე მის გარეთაც ვგრძნობ, რაც ჩემთვის ძალიან სასიამოვნოა.

- აპირებს ზაფხულში ქუთაისური გუნდი გაძლიერებას? რა იქნება რაიონისპირელთა მთავარი მიზანი მომდევნო სეზონისთვის?

- “ტორპედოს” მთავარი მიზანი საპრიზო ადგილია. დარწმუნებული ვარ, გავძლიერდებით, თანაც საკმაოდ.

- და ბოლოს, როგორ შეაჯამებდი “ტორპედოს” მიერ განვლილ, მიმდინარე სეზონს და კმაყოფილი ხარ თუ არა, გუნდის ნაჩვენები შედეგით?

- გუნდმა დასახული მიზანი შეასრულა და ცუდადაც არ გვითამაშია. უბრალოდ, სამწუხარო ქულები დავკარგეთ, რამაც ძალიან იმოქმედა სატურნირო ცხრილზე. საბოლოო ჯამში, მეორე წრე კარგად ჩავატარეთ.

„დინამო“ – „სამტრედიის“ ხვალინდელი საქართველოს თასის ფინალური შეხვედრის შესახებ დღევანდელ პრესკონფერენციაზე სამტრედიელთა კაპიტანმა დავით კვირკველიამ ისაუბრა.

„ყველა ფეხბურთელმა იცის, თუ რა თამაში გველის წინ. თასის ფინალში ისტორიაში პირველად მოვხვდით. ხვალინდელი მატჩისთვის მზად ვართ“, – განაცხადა კვირკველიამ.

შეგახსენებთ, რომ საქართველოს თასის ფინალური მატჩი, ხვალ, თბილისის დროით, 19:00 საათზე, მიხეილ მესხის სახელობის სტადიონზე გაიმართება. შეხვედრაზე დასწრება თავისუფალია.

დღეს გაიმართა საქართველოს დავით ყიფიანის სახელობის თასის ფინალი, სადაც თბილისის “დინამომ” სამტრედიის “სამტრედია” გამანადგურებელი ანგარიშით, 5-0 დაამარცხა.

მატჩთან დაკავშირებით Fanebi.com-თან კომენტარი დედაქალაქელთა შემტევმა, საბა ლობჟანიძემ გააკეთა.

“მატჩი ჩვენთვის ძალიან კარგი გამოვიდა. ბიჭებმა მოსაგებად ყველაფერი გავაკეთეთ. მწვრთნელის დავალებები კარგად შევასრულეთ. ბრძოლა და ჟინი არ დავაკელით, რაც ანგარიშზე აისახა. ეს მოგება ეძღვნება იმ ხალხს, რომლებიც “დინამოს” მთელი სეზონის განმავლობაში გვერდში ედგნენ. დიდი მადლობა გულშემატკივრებს, თანადგომისთვის”.

გუშინ, საქართველოს დავით ყიფიანის სახელობის თასის ფინალი გაიმართა. თბილისის “დინამომ” “სამტრედია” გამანადგურებელი ანგარიშით, 5-0 დაამარცხა.

მატჩის შემდეგ, “დინამოელთა” ამჟამინდელ კაპიტანს, ლაშა თოთაძეს Fanebi.Com გაესაუბრა.

“ამ მოგებას პირველ რიგში გლადიატორებს ვუძღვნით. ეს ყველაზე მეტად დაიმსახურეს. ისინი მთელი სეზონის განმავლობაში გვერდში ძალიან გულიანად გვედგნენ. მათი მხრიდან ერთი კრიტიკა არ ყოფილა, მიუხედავად იმისა, რომ ჩვენ ამას ვიმსახურებდით. რაც შეეხება თამაშს, სასიხარულოა, რომ დამაჯერებლად მოვიგეთ და “დინამომ” წელი უტიტულოდ არ დაასრულა. მადლობა ყველა ფეხბურთელს. ბიჭებმა ყველაფერი გააკეთეს, რომ თასი ჩვენთან დარჩენილიყო”.

როგორც იცით, ს.კ “ზესტაფონი” ოფიციალურად დაიშალა. იმერული გუნდიდან ბევრი თავისუფალი აგენტი დარჩა და მათ შორის უნიჭიერესი ახალგაზრდები.

ქართველ გულშემატკივარს მათი ბედი განსაკუთრებულად აინტერესებს. Fanebi.Com კი სწორედ ამ თემასთან დაკავშირებით “ზესტაფონელთა” ყოფილ 18 ნახევარმცველს, მათე კვირკვიას გაესაუბრა.

- “ზესტაფონი” დაიშალა. ზოგმა უცხოეთს მიაშურა, ზოგმა თავის წარმოჩენის სურვილი საკუთარ ქვეყანაშივე გამოთქვა. როგორია შენი გეგმები მომავალთან დაკავშირებით, აპირებ თუ არა საქართველოში დარჩენას და რამდენად დიდია ამის შანსი?

- პირველ რიგში, ყურადღება “ზესტაფონზე” მინდა გავამახვილო. ძალიან დამწყდა გული იმ გუნდის დაშლაზე, რომელიც წლების მანძილზე საქართველოში ერთ-ერთი საუკეთესო გუნდი იყო. რაც შეეხება ჩემს გეგმებს, მაქვს უცხოეთის ვარიანტები, მაგრამ ჯერ-ჯერობით დაზუსტებით ვერ გეტყვით, კარიერას ქვეყნის გარეთ გავაგრძელებ თუ ქართულ კლუბებში. აქ არ მქონია არანაირი შემოთავაზება და თუ მექნება, დავფიქრდები და შემდეგ გადავწყვეტ ყველაფერს.

- ვისაუბროთ საქართველოს ჩემპიონებზე და თავად ჩემპიონატში არსებულ სიტუაციაზე. შენი აზრით, იმსახურებდა გორის “დილა” ჩემპიონობას? შეძლებენ ისინი ევროასპარეზზე ქვეყნის სახელის წარმატებულად წარმოჩენას?

- რა თქმა უნდა, გორელები ამ ტიტულს იმსახურებდნენ, რადგან “დილა” მთელი სეზონის მანძილზე სტაბილურად გამოიყურებოდა. ჩემი აზრით, სწორედ მათ აქვთ ევროტურნირებზე ყველაზე კარგი შანსი და ყველა ქართულ კლუბს წარმატებას ვუსურვებ.

- და ბოლოს, თქვენი აზრით, რისი ბრალია ქართულ ფეხბურთში წარმოქმნილი პრობლემები და რა დრო დასჭირდება მათ აღმოფხვრას?

– სამწუხაროდ, ამ კითხვაზე პასუხის გაცემა საკმაოდ რთულია, მაგრამ იმედი მაქვს, ქართველი გულშემატკივარი სულ მალე იხილავს იმ ფეხბურთს ჩვენი ქვეყნის გუნდებისგან, რომელთაც ასე ელიან.

ესპანეთის ნაკრების 19-წლამდელთა ნაკრების მთავარმა მწვრთნელმა ლუის დე ლა ფუენტემ საქართველოსთან ევროპის ჩემპიონატის ელიტრაუნდის განვლილი მატჩი შეაფასა.

„დღეს საუკეთესო ჩვენი გუნდის მოგება იყო. აღსანიშნავია, რომ მეორე ნახევარში საქართველომ გვაჯობა.

ამჟამად მხოლოდ თურქეთთან შეხვედრაზე ვფიქრობთ. რაც შეეხება პორტუგალიას, მას საქართველოსთან მატჩში გაუჭირდება“, – განაცხადა ესპანელთა დამრიგებელმა.

საქართველოს 19-წლამდელთა ნაკრების მთავარმა მწვრთნელმა გიორგი დევდარიანმა მიხეილ მესხის სახელობის სტადიონის საპრესკონფერენციო დარბაზში ელიტრაუნდის მეორე მატჩი შეაფასა, რომელშიც მისი გუნდი პორტუგალიასთან ანგარიშით 2:3 დამარცხდა.

„საყურებლად ძალიან საინტერესო თამაში გამოვიდა. ყველა დაიღალა იმ ფრაზით, რომ კარგად ვითამაშეთ და დავმარცხდით, თუმცა დღეს ჩვენი შტაბის მიერ გაწეული სამუშაოთი და ფეხბურთელების მეირ ნაჩვენები თამაშით ამაყი ვარ. პორტუგალია და ესპანეთი თავის ასაკში საუკეთესო გუნდები არიან.  ჩვენი ჩემპიონატის ტემპის გათვალისწინებით, ბოლო თხუთმეტ წუთში სათამაშოდ მზად არ ვართ, რაზეც წინა თამაშის შემდეგაც და იქამდეც ვისაუბრე. 

ყველა ცვლილება იძულებითი გამოგვივიდა – სამივე მოთამაშე მოედნიდან დაღლილობის გამო გავიყვანე. ვთვლი, რომ პრობლემა სწორედ ამაშია – ჩვენ დავიღალეეთ.

ამ ასაკში თუკი ვინმე ნიჭიერი იყო, შანსი და თამაშის საშუალება მივეცი. ჩემი აზრით, ამით ეროვნულ ნაკრებსაც დავეხმარეთ, რადგან პიროვნული და საფეხბურთო თვისებების დახმარებით, ამ ფეხბურთელებს შორის მთავარ გუნდში თამაში ბევრს შეუძლია. ჩემი მთავარი მიზანი სწორედ ეს არის. რა თქმა უნდა, შედეგიც მნიშვნელოვანია, მაგრამ უფრო პრიორიტეტული ამ ბიჭების სწორ გზაზე დაყენებაა.

ზარანდია პირველ თამაშშიც დისკვალიფიკაციის გამო გვაკლდა. შესარჩევი ეტაპის ბოლო მატჩში მან უაზრო ყვითელი ბარათი მიიღო. ესპანეთთან მისი ყოფნის შემთხვევაში, ვფიქრობ, სულ სხვა შედეგს მივიღებდით. ის თურქეთთანაც დაგვაკლდება. სამწუხაროდ, ის ვერ გაიზარდა. იმედია, ეს მალე შეიცვლება“, – განაცხადა დევდარიანმა.

3 ივნისს, საქართველოს 21-წლამდე ფეხბურთელთა ნაკრები ევროპის ჩემპიონატის საკვალიფიკაციო ეტაპზე პირველ მატჩს გამართავს. ალექსანდრე ჩივაძის გუნდი უკვე სან მარინოშია, სადაც სულ მალე ამ ქვეყნის ახალგაზრდული ნაკრების წინააღმდეგ ითამაშებს.

გუნდთან ერთად იმყოფება “ლოკომოტივის” 21 წლის მეკარე ბაჩო მიქავა, რომელსაც Fanebi.Com დაუკავშირდა და თავდაპირველად, “ბორჯომისა” და “მეტალურგის” წინააღმდეგ გამართულ მატჩზებზე ესაუბრა.

- ვფიქრობ, “ლოკომოტივსა” და “ბორჯომს” შორის გამართული მატჩის სანახაობრივი იყო. მაყურებელმა კარგი თამაში იხილა, რაც მთავარია, ექვსი გოლი გავიდა. იყო დამატებითი ტაიმები და პენალტების სერია.

- ამის შემდეგ, რუსთავის “მეტალურგს” შეხვდით, რომელიც ანგარიშით 5:0 დაამარცხეთ. ელოდი ასეთ იოლ გამარჯვებას?
- სიმართლე გითხრათ, გამარჯვებას ველოდი, მაგრამ არ მეგონა, ასე იოლად თუ მოვიგებდით. “მეტალურგი” უმაღლეს ლიგაში თამაშობდა და გვეგონა, რომ ეს გუნდი უფრო დიდ წინააღმდეგობას გაგვიწევდა.

- რა მიზანი ექნება “ლოკომოტივს” უმაღლეს ლიგაში?
- “ლოკომოტივი” ყველა თამაშზე ბოლომდე იბრძოლებს. ჩვენი მიზანი კი ის იქნება, რომ ცხრილში რაც შეიძლება კარგი პოზიცია დავიკავოთ. ალბათ, უფრო მაღალი ადგილებისათვის ვიბრძოლებთ.

- ახლა ნაკრებზეც გკითხავთ. ალექსანდრე ჩივაძემ 21-წლამდელთა გუნდში გამოგიძახათ. პირველ მატჩს სან მარინოს წინააღმდეგ გამართავთ…
- ვემზადებით და სამი ქულის მოპოვებას ვგეგმავთ. საკვალიფიკაციო ეტაპის გამარჯვებით დაწყება ძალიან მნიშვნელოვანია, ამიტომ ჩვენი მიზანი მხოლოდ გამარჯვებაა. თუმცა, ადვილი თამაში არ გველის.

- როგორ ფიქრობ, რა შანსი აქვს საქართველოს ნაკრებს საკვალიფიკაციო ეტაპზე, სადაც სან მარინოს გარდა, ჩვენი გუნდის მეტოქეები ესპანეთის, შვედეთის, ხორვატიისა და ესტონეთის ნაკრებები არიან?
- მთავარია, ყველა თამაშზე ვიბრძოლოთ და ჩვენი ფეხბურთი ვითამაშოთ. დაუმარცხებელი გუნდი არ არსებობს. თუ ყველა მატჩს მონდომებით ჩავატარებთ, საქართველოს ნაკრებს ჯგუფში მოწინავე პოზიციის დაკავების კარგი შანსი ექნება.

მოგეხსენებათ, ოფიციალურად, დღეს დილიდან უეფას სუპერთასზე დასასწრები ბილეთების გაყიდვა დაიწყო, რომელთა შეძენა მსურველებს საიტ Biletebi.ge-ზე შეუძლიათ. თუმცა, დილიდანვე საიტზე პრობლემები შეიქმნა, ამის გამო ბილეთების შეძენას აქამდე უამრავი მომხმარებელი ვერ ახერხებს. აღნიშნულ პრობლემასთან დაკავშირებით საიტის ერთ-ერთი წარმომადგენელი ტელეკომპანია „რუსთავი 2“-ს ვებსაიტს გაესაუბრა.

„მაქსიმალურად ვცდილობთ, ფილტრი მაინც დავაყენოთ და ნაწილ ნაწილ შევუშვათ ხალხი.

წამში მოდის 10 ათასზე მეტი ტრანზაქცია, ამას „ამაზონის“ სერვერი თუ გაუძლებს მხოლოდ“, – განუცხადა Biletebi.ge-ს წარმომადგენელმა „რუსთავი 2“-ს.

გარდა ამისა, ავად რესპოდენტის თქმით, ამჟამად ჯერჯერობით უცნობია, თუ როდის აღდგება საიტის მუშაობა.

„ცხინვალის“ მთავარმა მწვრთნელმა კახა კაჭარავამ „პიუნიკთან“ მოგებული მატჩი შეაფასა.

„თამაში არც ისე საინტერესო გამოდგა. ნებისმიერ შემთხვევაში, იგრძნობოდა, რომ შეთამაშებული გუნდი გვიპირისპირდებოდა, რომელსაც კარგი მწვრთნელი ჰყავს.

რაც შეეხება ჩემს გუნდს, მის შემადგენლობაში ბევრი გამოუცდელი ფეხბურთელია, რომელიც 17-18 წლისაა. იმედია, გამოცდილებას ეს მოთამაშეები მალე მიიღებენ.

ისტორიაში პირველად „ცხინვალი“ ევროპის ლიგაზე ითამაშებს, რაც ჩვენთვის მნიშვნელოვანია. ამას სხვა მხრიდან ვუყურებთ – გვსურს, ყველამ იცოდეს, რომ ცხინვალი – საქართველოა. მიხარია, რომ დღეს სტადიონის ტაბლოზე ჩვენი სახელი ეწერა. დიდი მადლობა მასპინძლობისთვის!

– „პიუნიკის“ შემადგენლობიდან ვის გამოარჩევდით?

– ჯონი ჯერემიას აღნივნა შემიძლია. მეტოქეთათვის ის ძალიან სახიფათო ფეხბურთელია. გარდა ამისა, მეკარესაც გამოვყოფდი

გორის „დილადან“ ბაქოს „ინტერში“ გადასული ნახევარმცველი ნიკა კვეკვესკირი azerisport.com-ს გაესაუბრა და ახალ კლუბში პირველი შთაბეჭდილებების შესახებ უამბო.

„მიხარია, რომ „ინტერის“ მსგავს კლუბთან კონტრაქტი გავაფორმე. ვფიქრობ, სწორად მოვიქეცი“.

– რა იცით „ინტერის“ შესახებ?

„ვიცი, რომ ეს ის გუნდია, რომელიც ყოველთვის ჩემპიონობისთვის იბრძოდა. აქ ბევრ ქართველს უთამაშია“

– ზაურ სვანაძეს, ალბათ, უკვე ესაუბრეთ

„მიხარია, რომ ასეთ სპეციალსიტთან ვიმუშავებ. ის მართლა მაღალი დონის სპეციალისტია“

– თქვენი „ინტერში“ მოსვლის მიზეზი რა გახდა?

„ლეგიონერის ცხოვრების გაგება მინდოდა. იმედია, გუნდს წარმატებას მოვუტან. შევეცდები, მაქსიმუმი გავაკეთო, რათა „ინტერმა“ ახალ სეზონშიც წარმატებულად ითამაშოს“

– ვარჯიშს როდის დაიწყებთ?

„პირველ ვარჯიშზე უკვე ვიყავი“

– სავარაუდოდ, თქვენს გადაწყვეტილებაზე იმ გარემოებამაც იმოქმედა, რომ „ინტერი“ დედაქალაქური კლუბია…

„ბაქო ძალიან მომეწონა. ეს ნამდვილად ლამაზი ადგილია“

– კონტრაქტი რამდენი ხნით იმოქმედებს?

„ერთწლიანი ხელშეკრულება გავაფორმეთ“

– „ინტერში“ ერთადერთი ქართველი არ იქნებით. ადაპტაციის პრობლემა არ უნდა იყოს…

„აქ ისეთ ფეხბურთელები შეიკრიბნენ, რომ ჩემი თანამემამულეების გარეშეც ყველაფერი გამოვიდოდა. მაგრამ, რა თქმა უნდა, ზაურ სვანაძისა და გიორგი ლომაიას ხილვა მიხარია.

– „ინტერის“ ფინანსური პრობლემების შესახებ თუ იცით?

„ეს ჩემი საქმე არ არის. ამ თემაზე საუბარი არ მსურს. მხოლოდ ერთს ვიტყვი: ყველაფერი კარგად იქნება“

– როდესაც „დილას“ ტოვებდით, ალბათ, სხვა კლუბების წიანდადებაც გექნებოდათ

„ამჟამად „ინტერის“ ფეხბურთელი ვარ. არამგონია, სხვა კლუბების წიანდადებებზე საუბარი ეთიკური იყოს. სხვა კლუბები არ მაინტერესებს, მაგრამ „დილას“ ყოველთვის ვუგულშემატკივრებ“

დღეს „დინამო არენაზე“ თბილისის „დინამომ“ ევროპის ლიგის პირველი საკვალიფიკაციო ეტაპის მატჩის წინ ღია ვარჯიში გამართა, რომლის დაწყების წინ სტადიონის საპრესკონფერენციო ოთახში გუნდის მთავარი მწვრთნელის გია გეგუჩაძის პრესკონფერენცია შედგა.

„ეს დღეც დადგა, წინ მნიშვნელოვანი თამაში გველის. მინდა, ყველა ქართულ კლუბს ევროთასებზე წარმატება ვუსურვო.

რაც შეეხება ჩვენს გუნდს, მომზადება თბილისში დავიწყეთ, შემდეგ კი სლოვენიაში შეკრება გავიარეთ, სადაც სამი ამხანაგური მატჩი ჩავატარეთ. ასეთ მომზადებს ხშირად მცირე ხარვეზები ახლავს თან, იმედია, მათ მალე გავასწორებთ.

ხვალ ტრავმების გამო კაკაბაძე და ვოლკოვი არ გვეყოლებიან.დანარჩენი ფეხბურთელები ამჟამად მწყობრში არიან.

აქცენტს არამხოლოდ ხვალინდელ მატჩზე გავაკეთებთ. შემდეგ ეტაპზე ორი მატჩის ჯამში გამარჯვებული გუნდი გადის,. შესაბამისად, წინასწარ რამის თქმისგან თავს შევიკავებ.

კონკრეტულად „გაბალაზე“ წარმოადგენა გვაქვს. მოგეხსენებათ, გუნდი სეზონის ბოლოს ბევრმა ფეხბურთელმა დატოვა, მაგრამ ისინი არაერთმა გამოცდილმა მოთამაშემ ჩაანაცვლა. ვფიქრობ, ეს დაბალანსირებული და ძლიერი გუნდია. სამწუხაროდ, ახალი შემადგენლობით „გაბალას“ ჩატარებული მატჩების ნახვა ვერ მოვასწარით.

ვცდილობთ, რომ მოთამაშეები ყველა სათამაშო სქემას მოერგონ და ნებისმიერი წყობისთვის მზად იყონ

სატრანსფერო ფანჯარა აგვისტოს ბოლომდეა ღია. შესაძლოა, გუნდი ახალი მოთამაშეებით შეივსოს. ყველაფერს მომავალი გვიჩვენებს“, – განაცხადა გეგუჩაძემ.

„დინამო არენას“ საპრესკონფერენციო დარბაზში მოახლოებული შეხვედრის შესახებ „გაბალას“ მთავარმა მწვრთნელმა რომან გრიგორჩუკმაც ისაუბრა.

„დარბაზში უამრავი ადამიანია, რაც სასიამოვნოა. „დინამოს“ საკმარისად მცოდნე თავკაცი ჰყავს.

„დინამოზე“ გარკვეულ ინფორმაციას ვფლობთ. სეზონის ბოლოს კლუბმა მთავარი მწვბრვთნელი შეიცვალა.

გაცილებით დიდი ცვლილებები ჩვენს კლუბში მოხდა. გუნდი 13 ფეხბურთელამდე დატოვა, მათი ადგილი კი არანაკლებად გამოცდილმა ახალწვეულებმ,ა დაიკავეს. შეიძლება ითქვას, რომ „გაბალა“ განახლდა“, – აღნიშნა უკრაინელმა სპეციალისტმა.

პრესკონფერენციის ბოლოს, აზერბაიჯანელმა ჟურნალისტმა გრიგორჩუკს მატჩის ფრედ დასრულების შემთხვევაზე ჰკითხე, რაზეც ხუმრობით საინტერესო პასუხი მიიღო:

„თუ შედეგზე ვითამაშებთ, ეს იმას არ ნიშნავს, რომ მეორე ნომრად ვიმოქმედებთ. მეორე ნორმად თამაშს არ ვაპირებთ. გვაწყობს თუ არა ანგარიში 0:0? არა, მხოლოდ ანგარიში 5:0 გვაწყობს“, – სიცილით განაცხადა გრიგორჩუკმა.

უეფას სუპერთასის ბილეთების გარშემო განვითარებულ მოვლენებს საქართველოს ეროვნული ნაკრების ყოფილი კაპიტანი და ქვეყნის ვიცე-პრემიერი კახი კალაძე გამოეხმაურა. იგი მომხდარს უპასუხისმგებლობად აფასებს.

“ფეხბურთის ფედერაციაც და biletebi.ge-ც მომზადებულნი უნდა შეხვედროდნენ გადაწყვეტილებას, როდესაც მათ ბილეთების გაყიდვის უფლება მისცეს. თუ უეფას მხრიდან იყო დავალება, ფეხბურთის ფედერაციას biletebi.ge-სთან ყველა დეტალი უნდა გაევლო, რომ ისინი მზად შეხვედროდნენ ასეთ აჟიოტაჟს. ჩვენ თავიდანვე ვიცოდით, თუ რამდენად დიდი ინტერესი იქნებოდა ამ თამაშის მიმართ. ამიტომ, ჩემი შეხედულებით, რაც მოხდა, ეს არის უპასუხისმგებლობა”.