საქართველოს ნაკრებისა და ყაზანის „რუბინის“ მცველმა სოლომონ კვერკველიამ „ურალთან“ რუსეთის პრემიერლიგის მე-10 ტურის მატჩის შესახებ ისაუბრა, რომელიც დღეს, თბილისის დროით, 20:00 საათზე დაიწყება.

„დარწმუნებული ვარ, „ურალთან“ მატჩში გაგვიჭირდება, თანაც ბოლო ტურში ამ გუდნმა „კრასნოდარს“ მოუგო. ამიტომაც, გვესმის, რომ კარგად უნდა მოვემზადოთ. სახლში ვთამაშობთ და ყველაფერს გავაკეთებთ, რათა მოვიგოთ. იმედია, გულშემატკივრები ამაში დამეხმარებიან. ფეხბუთელისთვის გულშემატკივართა მხარდაჭერა და სავსე ტრიბუნები ძალიან მნიშვნელოვანია. ისინი ძალიან გვეხმარებიან. ამის კარგი მაგალითი „ლოკომოტივთან“ მატჩია, რომელშიც კარგი ფეხბურთი გაჩვენეთ. „ურალთან“ ბოლომდე ბრძოლას შევეცდებით“, – განაცხხადა კვერკველიამ.

„ცხინვალის“ მთავარმა მწვრთნელმა კახა კაჭარავამ ქუთაისის „ტორპედოსთან“ გასვლითი შეხვედრა შეაფასა, რომელიც მისმა გუნდმა ანგარიშით 3:1 მოიგო.

„ქუთაისის „ტორპედო“ ქართული ფეხბურთის ერთ-ერთი ბრენდია, ტრადიციული მეტოქეა და წინასწარ ვიცოდი, რომ მათთან სტუმრად თამაში ადვილი არ იქნებოდა. ჩემი ფეხბურთელების თამაშით კმაყოფილი ვარ, მაგრამ უპირატესობის შენარჩუნების კუთხით სამუშაო ბევრი გვაქვს. მნიშვნელოვანი გამარჯვება მოვიპოვეთ და ახლა „კოლხეთთან“ მატჩზე უნდა გადავერთოთ. „ტორპედოს“ წარმატებებს ვუსურვებ“, – ციტირებს სპეციალისტს კლუბის „ფეისბუქის“ გვერდი.

მარტვილის “მერანის” რიგებში ბერძენი ფეხბურთელი ალექსანდროს პაპადოპულოსი თამაშობს. ალექსი სწორედ მაშინ შემოუერთდა მარტვილის გუნდს, როცა “მერანელებს” პრობლემები ჰქონდათ. სხვადასხვა მიზეზების გამო ძირეულად შეცვლილ “მერანს” ცუდი სტარტი ჰქონდა მიმდინარე ეროვნულ ჩემპიონატში, თუმცა ბოლო ტურის მატჩში “გურიასთან” მარტვილელებმა სამ ქულასთან ერთად, გამარჯვების მუხტი და განწყობა დაიბრუნეს, რაშიც თავისი წვლილი პაპადოპულოსმაც შეიტანა. (მის მიერ ჩაწოდებული ბურთი ჩაჭრა “გურიას” ფეხბურთელმა საკუთარ კარში). თუ როგორ მოხვდა პაპადოპულისი “მერანში” და რას ფიქრობს ზოგადად ქართულ ფეხბურთსა და საქართველოზე, ამ კითხვებით თავად ბერძენ ფეხბურთელს მივმართეთ:

— ალექს, გულშემატკივარს აინტერესებს ალბათ, თუ როგორ მოხვდი “მერანში” და მანამდე სად მოღვაწეობდით.
— საბერძნეთიდან ვარ და საბერძნეთის ეროვნული ჩემპიონატის პირველი და მეორე ლიგის გუნდებში ვთამაშობდი. “მერანში” ჩემი მოხვედრა ოჯახურმა მდგომარეობამ განაპირობა. მშობლები გარდამეცვალა ადრეულ ასაკში.

— ლანჩხუთის “გურიასთან” გამარჯვება და თქვენი კარგი თამაში, მშობლების ხსოვნას მიუძღვენით, შეგიძლიათ გვითხრათ რა დაემართათ მათ?
— დედას სიმსივნე ჰქონდა, 5 წელი იტანჯებოდა და ძალიან დიდი თანხა დავხარჯე მის გადასარჩენად, მაგრამ მაინც ვერ შევძელი, გულის პრობლემები აწუხებდა მამაჩემსაც და ორივე დავკარგე. ძალიან მძიმე სტრესი იყო ეს ჩემთვის. ყველაფერზე ამიცრუვდა გული, მათ შორის ფეხბურთზეც. ჩემს ქვეყანაში გაჩერებაც არ მინდოდა, იმდენად ცუდად ვგრძნობდი თავს. შემდეგ მარტვილის “მერანზე” გავიგე შემთხვევით და მეგობრებმაც მირჩიეს, რომ მეცადა ფეხბურთში დაბრუნება და ამით სხვა რამეზე გადამეტანა ჩემი ტკივილი. აქ თბილად მიმიღეს, ვარჯიშები დავიწყე და იმედია, მალე შევალ ოპტიმალურ ფორმაში.

— დიდი ხანი არაა, რაც მარტვილში ხართ, მაგრამ გარკვეული წარმოდგენა გექნებათ “მერანზე”. რას იტყვით მარტვილის გუნდზე?
— ძალიან ლამაზი რაიონია მარტვილი, თავისი ადგილმდებარეობით. როგორ შეიძლება, არ მოგწონდეს აქაური ჰაერი და გარემო. რაც შეეხება თვითონ გუნდს, აქ ბევრი ნიჭიერი ახალგაზრდა ფეხბურთელი არის და მათ შეუძლიათ დიდი ფეხბურთი ითამაშონ, ოღონდ, ამისთვის აუცილებელია ძალიან ბევრი შრომა, წარმატების მთავარი მოთხოვნაა შრომა.

— როგორ ფიქრობთ, შეძლებს “მერანი” უმაღლეს ლიგაში ადგილის შენარჩუნებას?
— რთული სტარტი ჰქონდა გუნდს, მაგრამ ყველაფერი წინაა, ვიბრძოლებთ და მაქსიმუმს გავაკეთებთ იმისთვის, რომ “მერანი” უმაღლეს ლიგაში დარჩეს. ძნელი იქნება, მაგრამ არა შეუძლებელი.

— და ბოლოს, რამდენ ხანს აპირებთ “მერანში” დარჩენას და რას ეტყოდით “მერანის” გულშემატკივარს?
— რამდენ ხანს დავრჩები, ამას მომავალი გვიჩვენებს, თუმცა სანამ აქ ვიქნები, “მერანისთვის” დავიხარჯები 100 პროცენტით, იმიტომ, რომ ეს ჩემი გუნდია დღეს. რაც შეეხება გულშემატკივარს, მე ვგრძნობ მათ მხარდაჭერას, ტაშს და ეს უფრო მეტს სტიმულს მაძლევს. მიხარია, რომ ასეთი დამოკიდებულება არის მარტვილში ფეხბურთის მიმართ. მათ ერთადერთს ვეტყვი, ყველაფერს გავაკეთებ იმისთვის, რომ “მერანის” წარმატებაში ჩემი წვლილი შევიტანო და ისინი გავახარო.

მოგეხსენებათ, გუშინ საქართველოს ფეხბურთის ფედერაციის ერთ-ერთი დელეგატი გეგა გობეჯიშვილი პოლიციამ ნარკოტიკების მოხმარების ბრალდებით დააკავა.

გობეჯიშვილი სფფ-ს საპრეზიდენტო არჩევნებზე რევაზ არველაძის მხარდამჭერია. ღამით არველაძის „ფეისბუქის“ გვერდზე სპეციალური განცხადება გამოქვეყნდა, რომელშიც აღნიშნული იყო, რომ კანდიდატი დღეს დაგეგმილ არჩევნებში მონაწილეობას იქამდე არ მიიღებდა, სანამ გობეჯიშვილს არ გაათავისუფლებდნენ. ცოტახნის წინ თავად არველაძემ თავისი პოზიცია უკვე ჟურნალისტებს გაუზიარა.

„არჩევნებში მონაწილეობას იქამდე არ მივიღებ, სანამ გობეჯიშვილს არ გაათავისუფლებენ“, – ციტირებს არველაძეს ადგილზე მყოფი ჩვენი კორესპონდენტი.

ამჟამად ამბის სხვა დეტალები უცნობია. რაიმე სახის სიახლის გაგებისთანავე Fanebi.com ინფორმაციას ოპერატიულად მოგაწვვდით.

სასტუმრო „ჰოლიდეი ინში“ საქართველოს ფეხბურთის ფედერაციის არჩევნების დაწყებას ელიან. ამ ეტაპზე, როგორც მოგახსენეთ, რეგისტრაცია თვრამეტმა დელეგატმა გაიარა.

ჟურნალისტებთან საუბრისას ერთ-ერთმა კანდიდატმა ლევან კობიაშვილმა აღნიშნა, რომ მის კონკურენტ რევაზ არველაძეს ერთ ოთახში დელეგატების ნაწილი ჰყავს ჩაკეტილი, რომელთაც გასვლის საშუალება არ აქვთ.

შეგახსენებთ, რომ ერთ-ერთი დელეგატის გეგა გობეჯიშვილის დაკავების შემდეგ არველაძემ არჩევნების გადატანა მოითხოვა.

სასტუმრო „ჰოლიდეი ინში“ საქართველოს ფეხბურთის ფედერაციის საპრეზიდენტო არჩევნები კვლავაც არ დაწყებულა. დაურეგისტრირებელი დელეგატები, რევაზ არველაძესთან ერთად, პროტესტის ნიშნად, ოთახში ჩაიკეტნენ.

როგორც თავად არველაძემ განაცხადა, მას სურს, რომ არჩევნები დღეს ჩატარდეს და ის, როგორც კანდიდატი, ორმაგ პასუხისმგებლობას გრძნობს, თუმცა სურს, რომ არჩევნებში მონაწილეობა ნარკოტიკების ტარებსითვის ბრალდებულმა გეგა გობეჯიშვილმაც მიიღოს.

მსგავსი კომენტარი ჟურნალისტებს საქართველოს ვეტერან ფეხბურთელთა კავშირის თავმჯდომარემ ვაჟა ჟვანიამაც მისცა, რომელმაც აღნიშნა, რომ არჩევნები ჯერჯერობით ვერ დაიწყება.

როგორც ცნობილია, ამჟამად გეგა გობეჯიშვილის საქმესთან დაკავშირებით სასამართლოში მოსამართლის მოსვლას ელიან.

ხვალ 2016 წლის ევროპის ჩემპიონატის შესარჩევ ეტაპზე საქართველოს ნაკრები ბოლო საშინაო მატჩს გამართავს. კახა ცხადაძის გუნდი გიბრალტარის ნაკრებს მიიღებს.

მატჩისწინა პრესკონფერენციაზე ცხადაძემ აღნიშნა, რომ ცუდი შედეგების მიუხედავად, მეტოქეს პატივს ვცემს და გუნდი ხვალინდელი შეხვედრისთვის სრული სერიოზულობით ემზადება.

“შემადგენლობაში პრობლემები გვაქვს. ანანიძე, ყენია, მჭედლიძე და დაუშვილი მომდევნო ორ თამაშში ვერ დაგვეხმარებიან, მაგრამ ვთვლი, რომ ოპტიმალური შემადგენლობაა და რესურსი გვაქვს.

მიუხედავად იმისა, რომ მეტოქე ჯგუფში ბოლო ადგილზეა და ბევრ გოლს უშვებს, ჩვენ პატივისცემით ვუდგებით. მთავარია, რომ მოედანზე ქაოსურად არ ვიმოქმედოთ. შეტევაში თავჯუდმოგლეჯილი წასვლას არ ვაპირებთ. როცა საჭირო იქნება, პრესინგზე ვითამაშებთ და თავსაც დავიცავთ”, – ამ სიტყვებით დაიწყო პრესკონფერენცია ცხადაძემ.

— ორი ფორვარდით ითამაშებთ? ფეხბურთის ფედერაციის ახალ პრეზიდენტს თუ შეხვდით?
— შეიძლება შევცვალო სქემა. ერთი თავდამსხმელით მეტი იქნება მოედანზე. ორ სქემაზე ვმუშაობთ და შეიძლება თამაშის მიმდინარეობის დროს შევცვალოთ. ვულოცავ ლევანს და წარმატებებს ვუსურვებ. თუ წარმატებული პრეზიდენტი იქნება, ეს ქართული ფეხბურთისთვის იქნება წარმატება. პრიორიტეტი კვლავ ნაკრებია და როცა ნაკრები წარმატებულია, ქვეყანაც წარმატებულია. ლევანს ორჯერ შევხვდი, გუშინ ბაზაზეც იყო მოსული, ფეხბურთელებს გაესაუბრა. სულ ორი დღეა, რაც პრეზიდენტი გახდა და გლობალურ საკითხებზე ვერ ვისაუბრებდით. ვისაუბრეთ ნოემბრის ამხანაგურ მატჩებსა და მომავალი წლის თამაშებზე.

— რას იტყვით გიორგი ჭანტურიაზე, რომელსაც მშვენიერი დებიუტი ჰქონდა “დუისბურგში”. შეიძლება, რომ იგი გერმანიის ნაკრებთან გასამართი მატჩისთვის გუნდს დაემატოს?
— ძალიან სასიხარულოა ჭანტურიას თამაში. იმედია, ასე გააგრძელებს. სულ ერთი კვირაა, რაც გუნდთან ერთად მუშაობს. კიდევ ერთხელ დავინახეთ მისი პოტენციალი. უხეშად რომ ვთქვათ, ეს ის ფეხბურთელია, რომელსაც თამაშის გაკეთება შეუძლია. გამიხარდა, რომ გერმანიაში მოხვდა, სადაც მაღალი პროფესიული დონეა. თუ მხარს აუბამს, ძალიან კარგი იქნება და ნაკრებისთვისაც სტაბილური მოთამაშე გახდება. მას დიდ პატივს ვცემ არამარტო როგორც ფეხბურთელს, არამედ პირადულადაც.

— რამდენად გაგიჭირდათ გიბრალტარის შესახებ ინფორმაციის მოძიება? თუ ხედავთ გიბრალტარის ნაკრებისგან საფრთხეს?
— ინფორმაცია ძალიან ბევრია და ამ მხრივ არანაირი პრობლემა არ ყოფილა. თითქმის ყველა მატჩი ვნახე, ექვსი შეხვედრა, ფეხბურთელებსაც ვანახეთ. ასე რომ, ხვალინდელი მატჩისთვის ძალზედ სერიოზულად ვემზადებით.

— ნიკოლოზ გელაშვილი და ბაჩანა ცხადაძე რა კრიტერიუმებით შეარჩიეთ?
— ისინი დიდი ხანია ნაკრების წევრები არიან და ამ კრიტერიუმით შევარჩიე.

— ბოლო დროს ნაკრებში ადგილი დაკარგა გიორგი ლორიამ, უთამაშებელია ნუკრი რევიშვილიც. ხვალ გიორგი მაკარიძეს ხომ არ მიეცემა შანსი?
— ხვალ გადაწყდება, ვინ დადგება კარში.

— ხვალინდელი მატჩისთვის ენდობით თუ არა ოთარ კაკაბაძეს? ჯაბა ლიპარტია და ავთო ებრალიძეც კარგად გამოიყურებიან და შესაძლებელია, რომ ნაკრებში ვიხილოთ?
— კაკაბაძე ხვალინდელი მატჩისთვის ემზადება. ჩვენ ყველას ვამზადებთ. ფაქტობრივად გადაწყვეტილი მაქვს, ვინ ითამაშებს, მაგრამ ხვალინდელ დღეს დაველოდოთ. კიდევ ბევრი ფეხბურთელია, ვინც უცხოეთში თამაშობს და სანახავი არიან. ნაკრების კარი ყველასთვის ღიაა და თუ დააკმაყოფილებენ მოთხოვნებს, გამოვიძახებთ.

— გუგა ფალავანდიშვილი ჯანო ანანიძის შემცვლელად მოიაზრება? მიეცემა თუ არა ხვალ მას სათამაშო დრო?
— რადგან გამოვიძახეთ, ესე იგი მოაზრება. ვცდილობ, ყველას ავუხსნა, რომ ვინც არის გამოძახებული, ყველა ძირითადი შემადგენლობის წევრია და მათი სასტარტო შემადგენლობაში დაყენება იმაზეა დამოკიდებული, თუ რა სქემით ვთამაშობთ.

საქართველოსა და გიბრალტარის ნაკრებებს შორის შეხვედრა “დინამო არენაზე” ხვალ, 20:00 საათზე დაიწყება და მას სერგეი ბოიკოს ხელმძღვანელობით უკრაინელ მსაჯთა ბრიგადა მოემსახურება. მატჩზე დასასწრები ბილეთების ფასი 5 და 10 ლარია.

ესპანეთის 21-წლამდელთა ნაკრების მთავარმა მწვრთნელმა ალბერტ სელადესმა საქართველოსთან ანგარიშით 5:2 მოგებული მატჩი შეაფასა.

„როგორც ველოდეთ, ღირსეულ მეტოქეს შევხვდით, რომელთან თამაში დასაწყისში გაგვიჭირდა.

არამგონია, მეორე ტაიმში, პირველ ტაიმთან შედარებით, უკეთესი თამაში მოტივაციასტან იყოს დაკავშირებული. ქართველები მონდომებულები არიან. თქვენი ნაკრები სულ უფრო და უფრო კარგ შთაბეჭდილებას ტოვებს.

ჯგუფი ძლიერი გუნდებითაა დაკომპლექტებული, მეორე ადგილის დაკავება ბევრს შეუძლია, მათ შორის საქართველოსაც.

მეტოქიის შემადგენლობიდან ვერავის გამოვყოფ, მაგრამ ხუთი მოთამაშის აღნიშვნა შეიძლება. ეს დაცვაში და თავდასხმაში მოქმედი ფეხბურთელები არიან“, – განაცხადა ესპანელმა სპეციალისტმა.

ესპანეთთან ანგარიშით 2:5 წაგებული მატჩის შემდეგ პრესკონფერენციაზე საქართველოს 21-წლამდელთა ნაკრების თავკაცმა ალექსანდრე ჩივაძემ ჟურნალისტების კითხვებზე პასუხს მხოლოდ შეხვედრის მცირე კომენტარით შეჯამება ამჯობინა.

„გუშინაც ვთქვი, რომ თანამედროვე ფეხბურთში, თუ ფიზიკურად მზად არ ხარ, სტრატეგიაზე და ტაქტიკაზე საუბარი ზედმეტია. დღეს ფიზიურ კონდიციებსა და ოსტატობას შორის განსხვავება ვნახეთ. სამწუხაროდ, ბავშვური შეცდომები დავუშვით. იმდენად ცუდად ვითამაშეთ, რომ კომენტარს ვერ ვაკეთებ, ყველაფერი ნათელია“, – განაცხადა დამწუხრებულმა ჩივაძემ.

სანაკრებო პაუზის შემდეგ საქართველოს უმაღლესი ლიგა დღეს, მიხეილ მესხის სახელობის სტადიონზე განახლდება, სადაც „საბურთალო“ საჩხერის „ჩიხურას“ შეხვდება. ხვალ კი ტურის და მთლიანად ჩემპიონატის ერთ-ერთი გამორჩეული შეხვედრა გაიმართება – ქუთაისში ერთმანეთს ადგილობრივი „ტორპედო“ და თბილისის „დინამო“ შეხვდებიან.

აღნიშნული თამაშის პირდაპირი რეპორტაჟი „საზოგადოებრივი მაუწყებლის“ არც პირველი და არც მეორე არხის პროგრამაში წერია. ამასთან დაკავშირებით „საზოგადოებრივი მაუწყებლის“ სპორტული მიმართლებით ხელმძღვანელს გიორგი ზურაბიშვილს დავუკავშირდით.

„სამწუხაროდ, ამ მატჩს ვერ ვაჩვენებთ. ტელევიზიას სულ ერთი მოძრავი სატელევიზიო სადგური აქვს, რომელიც თბილისობაზე მიჰყავთ და ამიტომ, სამწუხაროდ, რეპორტაჟს ვერ ვაკეთებთ“, – გვიპასუხა ზურაბიშვილმა.

სათქმელია, რომ მატჩის პირდაპირ რეპორტაჟს „რიონი ტვ“ გადმოსცემს. „ქართული დერბი“ ხვალ 15:00 საათზე დაიწყება.

გამთენიისას თბილისში საფეხბურთო კლუბ „საბურთალოს“ მოწვევით მადრიდის „რეალის“ ლეგენდარული ფეხბურთელი ფერნანდო იერო ჩამოვიდა. ხვალ იერო ახალგაზრდულ ჩემპიონთა ლიგაზე „საბურთალოს“ შეხვედრას დაესწრება, მანამდე კი მასმედიის წარმომადგენლებს შეხვდება.

„მოხარული ვარ, რომ საქართველოში „საბურთალოს“ მოწვევით ჩემს მეგობრებთან ჩამოვედი. მე და კლუბის გენერალური დირექტორი რამდენიმე კვირის წინ მადრიდში შევხვდით, სადაც საინტერესო საუბარი შედგა. გავეცნობი კლუბის ხედვას, რა გეგმები აქვთ მომავალში და როგორ აპირებენ განვითარებას, შევხვდები აკადემიის ხელმძღვანელს. დავესწრები უეფას ახალგაზრდული ლიგის მატჩს თბილისური კლუბის მონაწილეობით. მექნება სხვა და სხვა საინტერესო შეხვედრები. ვფიქრობ, ამ ორ დღეს ნაყოფიერად გამოვიყენებთ”, – ციტირებს იეროს „საბურთალოს“ ოფიციალური გვერდი.

ლეგენდარული ესპანელი ფეხბურთელი – ფერნანდო იერო საქართველოს ფეხბურთის ფედერაციას ესტუმრა. ესპანელი ვეტერანი ფეხბურთელი, რომელიც ამჟამად საქართველოში საფეხბურთო კლუბ „საბურთალოს“ მოწვევით იმყოფება, ფეხბურთის ფედერაციის პრეზიდენტს – ლევან კობიაშვილსა და ფედერაციის გენერალურ მდივანს – დავით მუჯირს შეხვდა.

„ძალიან მოხარულები ვართ, რომ ფერნანდო იერო გვესტუმრა. ეს იყო გაცნობითი ხასიათის შეხვედრა. მან მომილოცა პრეზიდენტად არჩევა და წარმატებები მისურვა.
ვისაუბრეთ სამომავლო გეგმებზე – თუ როგორ და რა ფორმით ვითანამშრომლებთ. ყოველთვის ვამბობდი და ვიმეორებ, რომ საერთაშორისო ურთიერთობები და კარგი კონტაქტები ძალიან მნიშვნელოვანია ჩვენთვის და ვეცდებით, ეს ყველაფერი ქართული ფეხბურთის საკეთილდღეოდ გამოვიყენოთ. იგივე გერმანულ მხარესთან, იგივე ესპანელებთან ძალიან მნიშვნელოვანი იქნება ჩვენი ურთიერთობები ბავშვთა ფეხბურთის მიმართულებით“ – განაცხადა შეხვედრის დასრულების შემდეგ ლევან კობიაშვილმა.

სფფ-ის პრესსამსახური

დანიურ „მიდტიულანდთან“ ახალგაზრდული ჩემპიონთა ლიგის განმეორებითი მატჩის შესახებ პრესკონფერენციაზე „საბურთალოს“ მთავარმა მწვრთნელმა გიორგი ჭიაბრიშვილმა ისაუბრა.

„ზედმეტი სიტყვები არ მიყვარს. ვიცი, რომ ჩემი ფეხბურთელების მჯერა და ისინი მოსაგებად არაფერს დაიშურებენ და მინდორზე ყველაფერს გააკეთებენ“ , – განაცხადა ჭიაბრიშვილმა.

შეგახსენებთ, რომ ორი კვირის წინ გასვლაზე პირველი შეხვედრა საბურთალოელებმა ანაგრიშთ 1:3 დათმეს.

როგორც მოგახსენეთ, 19-წლამდელთა ჩემპიონთა ლიგაზე შვედურ „მალმიოსთან“ შედეგიანი ფრით, 5:5 დასრულებულ შეხვედრაში ერთ-ერთი გოლი დონეკის „შახტარის“ ქართველმა ნახევარმცველმა გიორგი არაბიძემ გაიტანა. მატჩის შემდეგ გიორგი უკრაინული კლუბის ოფიციალურ ვებსაიტს გაესაუბრა და განვილი შეხვედრა შეაფასა.

„მიხარია, რომ იუნიორთა ჩემპიონთა ლიგაზე „შახტარის“ შემადგენლობაში პირველი მატჩი ჩავატარე. მართალია, ადაპტაციის პერიოდი ჯერ არ დამისრულებია, განვითარება და პროგრესი საჭიროა. დღეს ძლიერი მეტოქე გვყავდა, რომელსაც დათმობა არ სურდა. ამას ანგარიშიც ადასტურებს.

როგორ ავხსნათ გოლების რაოდენობა? ვფიქრობ, მატჩის გარკვეულ ეპიზოდეში ორივე გუნდი კონცენტრაციას კარგავდა. თანაც, შეცდომები როგორც „მალმიოს“, ასევე ჩვენ გვქონდა. შედეგით, რა თქმა უნდა, უკმაყოფილოები ვართ, უფრო მეტის გატანაც შეგვეძლო. ამის მიუხედავად, საფინალო სასტვენის შემდეგ მწვრთნელმა ყველას მადლობა გადაგვიხადა.

გვესმის, რომ ტაბლოზე დაფიქსირებული ანგარიში კარგი არ არის. მოგება გვსურდა, რაც ვერ გამოგვივიდა. ჯგუფიდან შანსები ჩემი შესაფასებელი არაა, მაგრამ ერთს გეტყვით: მაქსიმუმ გავაკეთებთ, რათა მიზანს მივაღწიოთ“, – განაცხადა არაბიძემ.

მარტვილის “მერანს” კარგი პერიოდი არ უდგას. გუნდი, რომელიც ყოველთვის გამოირჩეოდა ბრძოლისუნარიანობით და თითქმის დაუმარცხებელი იყო საკუთარ მოედანზე, მიმდინარე ეროვნულ ჩემპიონატში არასტაბილურად გამოიყურება, რაც კლუბის მიერ ნაჩვენებ შედეგზეც აისახა. მარტვილელებს მე-9 ტურის თავზე მხოლოდ 3 ქულა აქვთ, თუმცა არსებულ ვითარებას თავისი მიზეზებიც აქვს, მთავარი მიზეზი კი ალბათ ის არის, რომ გუნდმა ჩემპიონატის დაწყებამდე ძირითადი ბირთვის შენარჩუნება ვერ შეძლო. წამყვანი ფეხბურთელების უმრავლესობას გუნდის დატოვება მოუწია ფინანსური კუთხის გამო და შეიძლება ითქვას, ფაქტიურად ახალი გუნდი შეიქმნა დუბლების, ჭაბუკთა ლიგის და რამდენიმე ახალწვეული ფეხბურთელისგან. “მერანს” მიმდინარე ეროვნული ჩემპიონატის წარუმატებელი სტარტის შემდეგ ახალი მთავარი მწვრთნელი ჰყავს. თუ რა მდგომარეობაა გუნდში და რა ცვლილებებია მოსალოდნელი, ამ საკითხთან დაკავშირებით სწორედ ბადრი კვარაცხელიას დავუკავშირდით.

— მართალია გუნდში ახალი მოსული ხართ, მაგრამ მცირე დროც საკმარისია იმისთვის, რომ გარკვეული წარმოდგენა გქონდეთ გუნდში არსებულ პრობლემებზე. რაში ხედავთ გამოსავალს?
— პრობლემებს რა გამოლევს საქართველოში. ისევე როგორც სხვა გუნდებს, მარტვილის “მერანსაც” აქვს პრობლემები, მაგრამ ეს იმას არ ნიშნავს რომ გუნდმა ფარ-ხმალი უნდა დაყაროს. საუბარს “საპოვნელასთან” მატჩით დავიწყებ, სადაც “მერანმა” ოთხი ძირითადი ფეხბურთელის გარეშე ითამაშა, რაც ნებისმიერი გუნდისთვის იქნებოდა დიდი დანაკლისი. ჯერ ავიღოთ “შუქურასთან” მატჩი, სადაც გუნდმა ნორმალური შთაბეჭდილება დატოვა, თუმცა, სამწუხაროდ, იმ შეხვედრაში ორი ფეხბურთელი გაგვიძევეს, ასევე ყვითელი ბარათი მიიღო შალიკაშვილმა, რომელსაც გაფრთხილებები დაუგროვდა და გამოტოვა მომდევნო შეხვედრა და დუბლების შეხვედრაში გაძევებული იქნა პაჭკორია. პასუხისმგებლობას კი არ ვიხსნი, უბრალოდ ეს ყველაფერი რომ გავლენას იქონიებდა შემდეგ თამაშზე, ცხადი იყო. აქიდან გამომდინარე, მოგვიწია როტაცია, ჩვენ სერიოზულად ვემზადებოდით ამ შეხვედრისთვის, მაგრამ, სამწუხაროდ, ვერ შევძელით იმ დასახული ამოცანის შესრულება, რაც გვქონდა. ახლა მთავარია “ლოკომოტივთან” მატჩში მოვიპოვოთ გამარჯვება. “ლოკომოტივთან” მოგებას უდიდესი მნიშნელობა აქვს როგორც შედეგისთვის, ასევე ფეხბურთელებისთვის, საკუთარ თავში ძალები რომ ირწმუნონ. “მერანში” ახალი მოსული ვარ და ჯერ ადრეა საუბარი იმაზე, რომ ძირეული ცვლილებები მომხდარიყო, თუმცა ვცდილობ, გუნდში შევქმნა ისეთი ატმოსფერო, რომ გამარჯვებულის მოტივაცია ჰქონდეთ ფეხბურთელებს, შეთამაშდნენ და უფრო მეტი პასუხისმგებლობით მოეკიდონ საქმეს. ბევრი სამუშაოა. “შუქურასთან” მატჩი ვახსენეთ და გამარჯვებას თუ არა, ფრეს მაინც ვიმსახურებდით ამ შეხვედრაში, მაგრამ შეცდომის გამო მივიღეთ ბოლო წუთზე გოლი, “საპოვნელასთანაც” იყო შეცდომები.

— ამ კონტიგენტით რომ უმაღლეს ლიგაში დარჩენა გაგიჭირდებათ, ფაქტია და თუ აპირებთ გუნდის გაძლიერებას ახლო მომავალში?
— აუცილებლად გვჭირდება გაძლიერება ყველა რგოლში, მაგრამ ეს იმას არ ნიშნავს, რომ გუნდი მთლიანად შეიცვლება. საჭიროა შეიქმნას კონკურენტუნარიანი გარემო, ერთ პოზიციაზე უნდა იყოს ორი ისეთი მოთამაშე, რომელსაც შეუძლია მაღალ დონეზე თამაში და ვინც დაიმსახურებს, ის ფეხბურთელი დაიცავს გუნდის ღირსებას. ვინც უფრო მეტს იშრომებს და შედეგიანი იქნება, ის ითამაშებს ძირითად შემადგენლობაში. მიჭირს ამის თქმა, მაგრამ, სამწუხაროდ, არ მყავს გუნდში ისეთი ფეხბურთელი, რომელსაც მოედანზე შემოვუშვებ და თამაშის ამინდს შეცვლის, ლიდერის როლს იკისრებს. თუ გვინდა, რომ წარმატებას მივაღწიოთ, ახალი სისხლია საჭიროა და მეორე წრისთვის ასეც მოხდება.
დუბლშემადგენლობიდან, ჭაბუკთა ლიგიდან გვყავს ჩვენ ნიჭიერი პერსპექტიული ფეხბურთელები, მაგრამ ჯერ ადრეა ამ ბავშვებს ასეთი დიდი ტვირთი ავკიდოთ. რა თქმა უნდა, გვყავს გამოცდილი ფეხბურთელებიც, რომლებიც გამოგვადგებიან და ვნახოთ, ყველაფერს გვიჩვენებს მომავალი“.

— სანამ “მერანში” მოხვიდოდით სამუშაოდ, ლანჩხუთიას “გურიას” მთავარი მწვრთნელი იყავით, თუმცა ძალიან ცოტა ხნით. შეგიძლიათ გვითხრათ, რა მოხდა მაშინ?
— იცით რა, მე არ ვარ ის მწვრთნელი, რომ ორი თვით მივიდე გუნდში სამუშაოდ. აი, დღეს “მერანში” ვარ და ჩემთვის ერთ თვეში შედეგი რომ მოეთხოვათ, არ მოვიდოდი. მე ვიცი ეს გუნდი, შესწავლილი მყავს და რა თქმა უნდა, მქონდა საუბარი გუნდის ხელმძღვანელობასთან, მაქვს ჩემი ხედვა და გეგმა. ამისთვის დროა საჭირო, ერთი და ორი თამაშით არ შეიძლება მოხდეს ანალიზი. ვფიქრობ, რომ “გურიას” შემთხვევაში მე და იმ გუნდის პრეზიდენტმა ნაჩქარევი გადაწყვეტილება მივიღეთ, რადგან, საბოლოო ჯამში, ასე მოხდა. “მერანში” მოვედი იმისთვის, რომ დასახული მთავარი ამოცანა შევასრულო, ამისთვის დროა საჭირო და შედეგიც აუცილებლად მოვა. მე აქ ძმაკაცობით და მეგობრობით არ მოვსულვარ, ჩემი მთავარი მიზანი გუნდის გადარჩენაა და თუ ეს ვერ შევასრულე, ავდგები და წავალ. გუნდის ხელმძღავნელობიდან ხელშეწყობა არის, აქ არის იმის პირობები, გუნდმა ივარჯიშოს, დაისვენოს. ახლა იდეალური მდგომარეობა საქართველოში არსად არ არის, მაგრამ ის პირობები რაც “მერანს” აქვს, არ ასახავს გუნდის მიერ ნაჩვენებ შედეგს. დღეს “მერანი” არ უნდა იყოს ბოლოსწინა ადგილზე, მაგრამ, როგორც გითხარით, ყველაფერს ვაკეთებს იმისთვის, რომ გუნდი წარმატებული გახდეს და აუტსაიდერთა ზონას თავი დააღწიოს.

— და ბოლოს, უახლოესი მატჩი თბილისის “ლოკომოტივთან” გაქვთ. როგორი განწყობაა გუნდში?
— მე დავესწარი “ლოკომოტივი” – “საბურთალოს” მატჩს. იცით, რომ ახალი მწვრთნელი ჰყავს “ლოკომოტივს” და აღნიშნულ შეხვედრაში გამარჯვებას მიაღწიეს. ეს მუხტი თითქმის ყველა ახალმა მწვრთნელმა გამოიყენა ჩემ გარდა და იმედია, ჩვენს შემთხვევაში სწორედ “ლოკომოტვთან” გატყდება ნავსი “მერანის” სასარგებლოდ. კარგი ძლიერი გუნდი ჩამოდის გამოცდილი ფეხბურთელებით, მათ შორის ასაკობრივი ნაკრების ფეხბურთელებიც არიან. ასე რომ, სერიოზული მოწინააღმდეგე გვყავს, თუმცა ჩვენ, მთავარია, ჩვენი საქმე გავაკეთოთ. ვინც უფრო მეტს მოინდომებს და მეტი ჟინი ექნება, ის გუნდი გაიმარჯვებს. ძალიან გვჭირდება გამარჯვება და იმედი მაქვს, ასეც მოხდება, რაშიც საშინაო არენა და ჩვენი ერთგული გულშემატკივარიც დაგვეხმარება.

საქართველოს ეროვნული საფეხბურთო ნაკრები ფიფას რეიტინგის 90-ე ნაკრებს ტალინში რამდენიმე საათში დაუპირისპირდება. ესტონეთთან და ალბანეთთან შეხვედრამდე გუნდში კიდევ ერთი იძულებითი ცვლილება განხორციელდა. მთავარი მწვრთნელის გადაწყვეტილებით ქვეყნის პირველ გუნდს ტალინის „ფლორას“ მოთამაშე ზაქარია ბეგლარიშვილი შეურთდა. კახა ცხადაძემ ესტონეთის ჩემპიონის დამატება დღეს გადაწყვიტა. მიზეზი თორნიკე ოქრიაშვილის პირადი ოჯახური მდგომარეობა გახდა,რომელმაც ტალინში ჩამოსვლა ვერ მოახერხა და ეროვნული გუნდის უახლოეს ამხანაგურ მატჩებს გამოტოვებს. საქართველოს ნაკრებმა მატჩის წინა ბოლო ვარჯიში კვლავ ს.კ. „ფლორას“ სათადარიგო მოედანზე გამართა. გუნდთან ერთად პირველად ივარჯიშა ზაქარია ბეგლარიშვილმა და ასევე „დინამო თბილისის“ წევრმა გიორგი გველესიანმა. ტალინში იმყოფება კიდევ ერთი დებიუტანტი „ფრაიბურგის“ წევრი, 21 წლის ლუკას ჰუფნაგელი. გერმანული კლუბის წევრმა დღევანდელი ვარჯიშის დასრულების შემდეგ საქართველოს ნაკრებში გამოძახებაზე პირველი კომენტარი გააკეთა:

„ძალიან ბედნიერი ვარ,რომ აქ ვიმყოფები საქართველოს ნაკრებთან ერთად. ეს ჩემთვის დიდი გამოცდილებაა. ძალიან კარგი გუნდია და იმედი მაქვს უახლოეს პერიოდში მისი ნაწილი გავხდები და შევძლებ ნაკრების დახმარებას“, – ამბობს ლუკას ჰუფნაგელი.

ზაქარია ბეგლარიშვილი: „დილით ფლორას ვარჯიშზე ვიყავი, როცა ნაკრებში გამოძახების შესახებ ჩემი ამბავი გავიგე. ძალიან გამეხარდა და მოტივირებული ვარ. მინდა მწვრთნელებს მადლობა ვუთხრა, რადგან ნაკრებში თამშის შანსი მომცეს. ვფიქრობ კარგი მატჩი იქნება, ესტონეთს ბოლო პერიოდში მომატებული აქვს, კარგი, კომპაქტური გუნდია და საინტერესო თამაში გამოვა. ვფიქრობ, გამარჯვების დიდი შანსი გვაქვს, რადგან საქართველოს ნაკრები უფრო ძლიერია. ბოლო პერიოდში ესტონეთის ნაკრებში თამაშის შანსი ბევრ ახალგაზრდა ფეხბურთელს მისცეს, შეიცვალა გუნდის ბირთვიც, მაგრამ ფიზიკურად კარგად არიან მომზადებულნი. ვფიქრობ, ინდივიდუალური ოსტატობის ხარჯზე უპირატესობა ჩვენ გვექნება“.

ოთარ კაკაბაძე : „მეორე დღეა, რაც ტალინში ვემზადებით. გუნდში კარგი განწყობაა, მიუხედავად იმისა, რომ ამხანაგური თამაშია, ვეცდებით რომ ბოლომდე დავიხარჯოთ და კარგი შედეგი ვაჩვენოთ“.

10 ნოემბრის საწვრთნელი პროცესი საათზე მეტ ხანს გაგრძელდა და მასში 22 ფეხბურთელი მონაწილეობდა. ესტონეთთან გამოძახებული ფეხბურთელების შემადგენლობა:

მეკარეები : გიორგი ლორია („კრილია სოვეტოვი“, რუსეთი), ნუკრი რევიშვილი („მორდოვია“, რუსეთი), გიორგი მაკარიძე („ფეირენსე“, პორტუგალია)

მცველები : გიორგი ნავალოვსკი („დილა“, გორი, საქართველო), გიორგი ფოფხაძე („ფლამურტარი“, ალბანეთი), ალექსანდრე ამისულაშვილი („კარშიაკა“, თურქეთი), გურამ კაშია („ვიტესი“, ჰოლანდია), გიორგი გველესიანი („დინამო თბილისი“, საქართველო), ოთარ კაკაბაძე („დინამო თბილისი“, საქართველო), გია გრიგალავა ( „პაფოსი”, კვიპროსი)

ნახევარმცველები : ჯაბა კანკავა („რეიმსი“, საფრანგეთი), სანდრო კობახიძე („ვოლინი“, უკრაინა), მათე ცინცაძე („დინამო თბილისი“, საქართველო) ვალერი ყაზაიშვილი („ვიტესი“, ჰოლანდია), გუგა ფალავანდიშვილი („დილა“, გორი, საქართველო), მურთაზ დაუშვილი („კარპატი“, ლვოვი, უკრაინა), გიორგი ჭანტურია („დუისბურგი“, გერმანია), ლუკას ჰუფნაგელი („ფრაიბურგი“, გერმანია), ზაქარია ბეგლარიშვილი („ფლორა“, ტალინი, ესტონეთი)

თავდამსხმელები : მათე ვაწაძე („ორჰუსი“, დანია), ბაჩანა ცხადაძე („ფლამურტარი“, ალბანეთი), ნიკოლოზ გელაშვილი („პაფოსი“, კვიპროსი)

კვიპროსის „ომონიას“ წევრი უჩა ლობჟანიძე ეროვნულ ნაკრებს 12 ნოემბერს ტირანაში შეურთდება და გუნდთან ერთად ალბანეთთან მატჩისთვის მოემზადება. ესტონეთისა და საქართველოს მატჩი ტალინის ცენტრალურ სტადიონზე, სადაც ადგილობრივი „ფლორა“ თამაშობს, 11 ნოემბერს თბილისის დროით 21 საათზე დაიწყება. მატჩის რეპორტაჟს საზოგადოებრივი მაუწყებლის მეორე არხი შემოგთავაზებთ.

სფფ-ის პრესსამსახური

როგორც აქამდე მოგახსენეთ, ათ ნოემბერს მოსკოვის „სპარტაკისა“ და საქართველოს ნაკრების ნახევარმცველს ჯანო ანანიძეს ფინეთში კოჭ-წვივის სახსრის ოპერაცია ჩაუტარდა. გუშინ ანანიძე ქალაქ ტურკუდან მოსკოვში დაბრუნდა და „სპარტაკის“ ბაზაზე მომზადება გააგრძელა. ამჟამად ჯანო კლუბის სამედიცინო შტაბის მეთვალყურეობის ქვეშ იმყოფება.

„ჯანოს ოპერაცია პროფესორ ორავამ ჩინებულად შეასრულა. ის ამ მხვრივ მსოფლიოს ერთ-ერთი წამყვანი სპეციალისტია. ფეხბურთელი მოედანზე 2-3 თვეში დაბრუნდება“, – განაცხადა მოსკოვური კლუბის ექიმმა ვლადისლავ კორნიცკიმ.

ფიზიოტერაპიის შესახებ „სპარტაკის“ პრესსამსხურს თავად მოთამაშემაც უამბო: „ოპერაციამ წარმატებით ჩაიარა, თავს კარგად ვგრძნობ. ძალიან მიხარია, რომ ბოლოს და ბოლოს ტკივილი აღარ შემაწუხეს. ოპერაცია, დაახლოებით, 40 წუთი გაგრძელდა. ექიმს მადლობას ვუხდი. კლინიკაში მისვლისთანავე ექიმმა დამიდასტურა, რომ ოპერაცია აუცილებლად უნდა გავაკეთო. პროცესს ძლიერმა პროფესორმა უხელმძღანელა. მან ყველაფერი წარმატებით შეასრულა. ახლა ფეხი აღარ მტკივა. სხვათაშორის, ფინელმა ექიმებმა იცოდნენ, რომ პროფესიონალი ფეხბურთელი ვარ. წასვლილსას მათ მაისური ვაჩუქე, რომელიც მოსკოვიდან ჩამოვიტანე.

ჯერ კიდევ ძნელია იმის თქმა, როდის შევძლებ სტადიონზე გუნდის მატჩების სანახავად მისვლას. „კრასნოდართან“ შეხვედრაში თანაგუნდელებს მხარს დავუჭერდი. ექიმებმა ცოტა ხნით მარცხენა ფეხზე ფეხსაცმლის ჩაცმა არ მირჩიეს. ვფიქრობ, ჩვენს სტადიონზე ცოტა გვიან მივალ, შეკრების დასაწყისისთვის კი მეც გამოვჯანრთელდები“.

საქართველოს ფეხბურთის ფედერაციის აღმასრულებელმა კომიტეტმა ვიცე პრეზიდენტები დაამტკიცა. ლევან კობიაშვილის მიერ წარდგენილმა კანდიდატებმა, ნიკოლოზ ჯღარკავამ და კახა ჭუმბურიძემ აღმასკომის წევრების სრული მხარდაჭერა მოიპოვეს. ნიკოლოზ ჯღარკავა 2006 წლიდან ბორის პაიჭაძის სახელობის „დინამო არენაზე” მუშაობდა. 2011 წლიდან „დინამო არენას“ დირექტორი იყო. მიმდინარე წლის იანვრიდან კი საფეხბურთო კლუბ „დინამო თბილისის“ აღმსრულებელი დირექტორის პოსტს იკავებდა. ჯღარკავამ 2015 წელს უეფას საფეხბურთო მენეჯმენტის კურსი წარმატებით დაამთავრა.

კახა ჭუმბურიძე ვეტერანი ფეხბურთელი, 2000-2002 წლებში საფეხბურთო კლუბ „საბურთალოს“ დირექტორის პოსტს იკავებდა. 2003-2004 წლებში „დინამო თბილისის“ აკადემის დირექტორი იყო, მომდევნო წელს კი კლუბის სპორტული დირექტორი გახდა. 2007 წლიდან დღემდე საფეხბურთო კლუბ „საბურთალოს“ გენერალურ დირექტორად მუშაობდა. ორივე ვიცე პრეზიდენტი კონკრეტულ დეპარტამენტებს უხელმძღვანელებს. სფფ-ის ვიცე პრეზიდენტებმა საფეხბურთო კლუბებში პოსტები უკვე დატოვეს.

აღმასრულებელი კომიტეტის სხდომის დასრულების შემდეგ, სფფ-ის გენერალურმა მდივანმა, დავით მუჯირმა ფუტსალის ეროვნულ ჩემპიონატში მოსალოდნელ ცვლილებებზე, ფეხბურთში ილია კოკაიას საფეხბურთო საქმიანობის აღდგენასა და საფეხბურთო კლუბ „გურიას“ მხრიდან მწვრთნელებისადმი არსებულ ფინანსურ დავალიანებაზე მედიის წარმომადგენლებთან ისუბრა. (სფფ-ის პრესსამსახური)

ნახევარმცველი თორნიკე გორგიაშვილი „ცხინვალს“ მიმდინარე სეზონში შეუერთდა. „სიონთან“ ბოლო ტურში კაჭარავას გუნდმა ანგარიშით 2:0 გაიმარჯვა, პირველი გოლი კი სწორედ გორგიაშვილმა გაიტანა. თავად ფეხბურთელმა Fanebi.com-თან საუბრისას ხსენებული შეხვედრა შეაფასა და რამდენიმე სხვა კითხვაზეც გვიპასუხა.

– „სიონთან“ ბოლო მატჩი შენი გუნდისთვის წარმატებული გამოდგა – ცხრილის სამეულში მყოფ გუნდს მოუგეთ, თანაც ცხინვალში სადებიუტო გოლიც გაიტანე. შეაფასე ეს შეხვედრა

– პირველ რიგში, შედეგისთვის, მინდა, მადლობა გადავუხადო ჩვენს ფეხბრუთელებს და მთლიანად გუნდს. შეხვედრა დაძაბული და საინტერესო გამოდგა. მთლიანობაში ვთვლი, რომ დამსახურებულად გავიმარჯვეთ. მოხარული ვარ, რომ ამ გამარჯვერბაში წვლილი შევიტანე

– „ცხინვალს“ ახლა ოთხმატჩიანი წაუგებელი სერია აქვს, თანაც ბოლო სამი შეხვედრიდან სამივე მოიგეთ… „შუქურასთან“ მატჩის შესახებ რას იტყოდი?

– უშუალო კონკურენტებთან ჩვენმა გუნდმა საკმაოდ რთული მატჩები მოიგო. ჩემია ზრით, პროგრესი არის. რაც შეეხება შემდეგ თამაშს, ვფიქრობ, რთული შეხვედრა გველის. „შუქურა“ კარგი გუნდია, თუმცა, ვეცდებით, სასურველ შედეგს მივაღწიოთ

– ანუ მიზანი მაინც სამეულში შესვლაა?

– რა თქმა უნდა, ევროტურნირებზე მოსახვედრად ვიბრძოლებთ

– ზაფხულში „ცხინვალი“ თავის ისტორიაში ევროტურნირებზე პირველად გავიდა, თუმცა გამოუცდელმა გუნდმა „ბოტოშანთან“ ორი მატჩის ჯამში წააგო. როგორ ფიქრობ, მიმდინარე სეზონის შედეგების მიხედვით, ევროტურნირებზე გასვლის შემთხვევაში, უფრო მომზადებულები იქნებით?

– წინასწარ რაიმის თქმა გამიჭირდება, მაგრამ გასვლის შემთხვევაში, შარშანდელზე უკეთესი შედეგის ჩვენებაზე ვიფიქრებთ

– თორნიკე, შენ „ზესტაფონიდან“ გიცნობენ, ამ კლუბში წლების განმავლობაში თამაშობდი და წარმატებას სწორედ მის რიგებში მიაღწიე…

– „ზესტაფონში“ გატაბული წლები დადებითად მახსენდება. ჩემთვის ეს კლუბი საყვარელი და ნომერ პირველიცაა. მის გულშემატკივრად სამუდამოდ დავრჩები.

– „ზესტაფონში“ ყოფნის პერიოდში რომელიმე უცხოური კლუბის წინადადება თუ გქონია?

– კლუბის ხელმძღვანელობისგან ვიცოდი, რომ შემოთავაზება იყო. ვთვლი, ამ თემაზე საუბარი აღარ ღირს, ეს ყველაფერი უკვე წარსულს ჩაბარდა

– პირველი წრის დარჩენილ სამ მატჩში შენი კვლავ ძირითად შემადგენლობაში ხილვის შანსები რამდენად მაღალია?

– ამ კითხვაზე პასუხი ნამდვილად არ მაქვს, ეს უშუალოდ მთავარი მწვრთნელის გადასაწყვეტია. ჩემთვის მისი გეგმები უცნობია

– აღნიშნული თემაზე კაჭარავასთან საერთოდ არ გისაუბრიათ?

– არა, ნამდვილად

საქართველოს ეროვნული საფეხბურთო ნაკრების მთავარმა მწვრთნელმა, მიხეილ მესხის სახელობის სტადიონის საპრესკონფერენციო დარბაზში ჟურნალისტების კითხვებს უპასუხა. ცხადაძემ ესტონეთისა და ალბანეთის ნაკრებებთან დაპირისპირების შესახებ ვრცლად ისაუბრა. მთავარმა მწვრთნელმა აღნიშნა, რომ განვილ ორ მატჩში ნაჩვენები შედეგი არადამაკმაყოფილებელია.

„არ აქვს მნიშვნელობა მატჩი ამხანაგურია თუ ოფიციალური, როცა ეროვნული ნაკრების სახელით თამაშობ, შედეგი ყოველთვის მნიშვნელოვანია. ეს ყველა ფეხბურთელმა კარგად უნდა გააცნობიეროს. ესტონეთთან და ალბანეთის ნაკრებთან დაპირისპირებაში რამდენიმე ახალი ფეხბურთელი გამოვცადეთ, რომელთაც მომავალში დავეყრდნობით. მინდოდა ამ ორ მატჩში მაქსიმალურად ყველა ფეხბურთელის პოტენციალი დამენახა. ესტონეთთან ამ ანგარიშით წაგების გამო ბოდიში მოვიხადე და ვთვლი,რომ ჩვენი ნაკრები ასე არავისთან არ უნდა აგებდეს. რაც შეეხება ალბანეთთან დაპირისპირებას, ვფიქრობ მათთან ფრე ცუდი შედეგი არ არის, მაგრამ ვინაიდან მატჩს ვიგებდით, უპირატესობა ბოლომდე უნდა შეგვენარჩუნებინა“.

ეროვნული ნაკრების მთავარმა მწვრთნელმა საქართველოს პირველ ლიგაში გარიგებული მატჩების შესახებაც ისაუბრა.

„კარგია, რომ ხობის „კოლხეთისა“ და ცხინვალის „ლიახვის“ მატჩი გარიგების მაღალი რისკის გამო გადაიდო. შეთანხმებული და ჩაწყობილი მატჩები უნდა აღმოიფხვრას და მიხარია, რომ ფეხბურთის ფედერაციამ ამ მიმართულებით აქტიური მუშაობა დაიწყო. ძალიან სერიოზულად უნდა დაისაჯოს ადამიანი, რომელიც ცდილობს ფეხბურთელები და განსაკუთრებით ახალგაზრდები ჩაითრიონ ასეთ თამაშში. იმედია საქმეს ბოლომდე მიიყვანენ და დამნაშავეები დაისჯებიან“.

 სფფ-ის პრესსამსახური